Kolegji i Posaçëm i Apelimit zhvilloi më datë 02.04.2025, ora 13:00, seancën gjyqësore publike të çështjes (JR) 41/2024, datë 21.10.2024, që i përket ankimit të Komisionerit Publik kundër vendimit të Komisionit të Pavarur të Kualifikimit, nr. 762, datë 15.05.2024, që lidhet me subjektin e rivlerësimit Afrim Shehu.
Kryesuesja e trupit gjykues bëri me dije se neni 179/b, pika 8 e Kushtetutës së Republikës së Shqipërisë dhe neni 199 i Kodit të Procedurës Civile ka përcaktuar kalimin e kompetencave nga Komisioneri Publik tek Drejtuesi i Prokurorisë së Posaçme, i përfaqësuar në këtë çështje me autorizim të veçantë nga prokurori i Prokurorisë së Posaçme z. Klodian Braho, i pranishëm në seancë.
Përfaqësuesja ligjore e subjektit të rivlerësimit çmoi të bazuar autorizimin e z. Braho dhe trupi gjykues legjitimoi prezencën e tij në këtë seancë gjyqësore.
Z. Braho deklaroi se është hequr dorë nga shkaqet e ankimit të lidhura me kriterin e vlerësimit të aftësive profesionale dhe vijoi me paraqitjen e shkaqeve të ankimit për kriterin e pasurisë. Ai u shpreh se subjekti i rivlerësimit nuk ka arritur të provojë ligjshmërinë e burimit të krijimit të pasurisë së tij dhe as të provojë të kundërtën e barrës së provës për këtë kriter. Përfaqësuesi i Prokurorisë së Posaçme kërkoi ndryshimin e vendimit të Komisionit të Pavarur të Kualifikimit, nr. 762, datë 15.05.2024 dhe shkarkimin nga detyra të subjektit të rivlerësimit Afrim Shehu.
Subjekti i rivlerësimit dhe përfaqësuesja e tij ligjore kundërshtuan shkaqet e ankimit dhe në mbështetje të pretendimeve të tyre depozituan akte, të cilat kërkuan të pranohen në cilësinë e provës nga trupi gjykues. Lidhur me këtë kërkesë, z. Klodian Braho u shpreh se nuk konstaton pengesa formale për administrimin e akteve.
Kryesuesja e trupit gjykues u kërkoi palëve të mbanin qëndrim lidhur me tri denoncime të publikut, dy prej të cilëve i ishin përcjellë institucionit të Komisionerëve Publikë para depozitimit të ankimit kundër vendimit objekt kontrolli, si dhe lidhur me to, nuk ishin ngritur shkaqe ankimi. Këto denoncime i ishin përcjellë më pas Kolegjit nga Institucioni i Komisionerëve Publikë. Përfaqësuesi i Prokurorisë së Posaçme deklaroi se asnjë prej tyre nuk përmban shkaqe për hetim të mëtejshëm. Subjekti i rivlerësimit dha shpjegime dhe paraqiti akte të reja lidhur me çështjet e ngritura në denoncime.

Pasi u konsultua, trupi gjykues vendosi të çelë hetimin gjyqësor të çështjes dhe të pranojë në cilësinë e provës të gjitha aktet e depozituara nga subjekti i rivlerësimit, përveç analizës financiare të vieteve 2009 – 2016, që është pjesë e dosjes gjyqësore.

Trupi gjykues vendosi të mos çelë hetim për denoncimet e publikut dhe pasi palët deklaruan se nuk kishin kërkesa procedurale, vendosi mbylljen e hetimit gjyqësor dhe i ftoi ato në paraqitjen e konkluzioneve përfundimtare.
Duke qenë se përfaqësuesi i Prokurorisë së Posaçme kërkoi kohë për përgatitjen e konkluzioneve përfundimtare, u vendos shtyrja e seancës për në datën 22.04.2025, ora 11;30.

Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr. 3, Tiranë.