Kolegji i Posaçëm i Apelimit (KPA), pranë Gjykatës Kushtetuese, bazuar në ligjin nr. 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë”, në vendimin e Kuvendit nr. 35/2024 datë 11.04.2024 “Për disa shtesa dhe ndryshime në vendimin e Kuvendit nr. 92/2017 “Për miratimin e strukturës organizative, organikës dhe klasifikimit të pagave të personelit të Kolegjit të Posaçëm të Apelimit”, i ndryshuar,
Shpall vendin vakant për pozicionin “Sekretar i Përgjithshëm”, pranë Kolegjit të Posaçëm të Apelimit
KËRKESAT E POSAÇME TË POZICIONIT “SEKRETAR I PËRGJITHSHËM”:
a) Të ketë përfunduar ciklin e dytë të studimeve universitare për drejtësi ose shkenca ekonomike me diplomë “Master i shkencave” në Shqipëri ose studimet universitare për drejtësi ose shkenca ekonomike jashtë vendit dhe ka marrë një diplomë të njësuar sipas rregullave për njësimin e diplomave, të parashikuar me ligj;
b) Të ketë një përvojë pune në nivel menaxherial dhe drejtues, jo më pak se 10 (dhjetë) vjet;
c) Ndaj tij të mos të ketë nisur një hetim penal, të mos jetë i dënuar me vendim të formës së prerë për kryerjen e një krimi ose për kryerjen e një kundërvajtjeje penale me dashje;
d) Të zotërojë shumë mirë gjuhën angleze;
e) Ndaj tij të mos jetë marrë masë disiplinore e largimit nga puna ose ndonjë masë tjetër disiplinore, e cila është ende në fuqi, sipas legjislacionit, në momentin e aplikimit;
f) Të mos ketë ushtruar funksione politike në administratën publike ose të ketë mbajtur pozicione drejtuese në një parti politike gjatë 10 (dhjetë) viteve të fundit.
KUSHTE TË PËRGJITHSHME
· Marrëdhënia e punës me Kolegjin e Posaçëm të Apelimit rregullohet nga dispozitat e ligjit nr. 7961, datë 12.7.1995, “Kodi i Punës i Republikës së Shqipërisë”.
· Bazuar në vendimin e Kuvendit nr. 35/2024 datë 11.04.2024 “Për disa shtesa dhe ndryshime në vendimin e Kuvendit nr. 92/2017 “Për miratimin e strukturës organizative, organikës dhe klasifikimit të pagave të personelit të Kolegjit të Posaçëm të Apelimit”, i ndryshuar, kategoria e pagës për pozicionin “Sekretar i Përgjithshëm” është I-1.
· Kandidatët duhet të sigurohen se plotësojnë kriteret për t’u pajisur me Certifikatë Sigurie, sipas vendimit të Këshillit të Ministrave nr.188, datë 04.03.2015.
· Kandidatët duhet të kenë aftësi për t’u përshtatur e punuar në grup, nën presion, si dhe në afate kohore të limituara.
Të gjithë aplikimet duhet të dorëzohen nga data 02 maj 2024 deri 03 qershor 2024, në një nga format e dhëna më poshtë:
· Dërgimin e kërkesës së bashku me dokumentet përkatëse, me anë të postës zyrtare pranë institucionit të KPA-së në adresën: Bulevardi “Dëshmorët e Kombit”, Nr. 03, Tiranë. Aplikimi në rrugë postare duhet të kryhet brenda datës 03 qershor 2024, i cili duhet të vërtetohet me fletë-mandatin e lëshuar nga institucioni përkatës postar. KPA-ja do të konfirmojë nëpërmjet postës elektronike marrjen e aplikimit përkatës.
· Dërgimin e kërkesës së bashku me dokumentacionin përkatës me anë të postës elektronike nga data 02 maj 2024 deri 03 qershor 2024, në adresën rekrutime@kpa.al. KPA konfirmon nëpërmjet postës elektronike marrjen e aplikimit përkatës.
Në kërkesën që paraqet, kandidati përcakton vendin vakant, për të cilin është i interesuar të aplikojë. Bashkëlidhur me kërkesën, kandidati dorëzon 1 (një) kopje të dokumenteve të mëposhtme:
1. Jetëshkrim profesional, përfshirë të dhënat e kontaktit, postën elektronike zyrtare dhe adresën postare;
2. Kopje të dokumenteve (diplomë, listë notash, letërnjoftimi (ID), librezë pune, dokument që vërteton njohuritë e gjuhëve të huaja) origjinal ose të noterizuar. Diplomat që janë marrë jashtë vendit, duhet të jenë njohur paraprakisht pranë institucionit përgjegjës për njëhsimin e diplomave, sipas legjislacionit në fuqi.
3. Dokument që vërteton se në ngarkim të tij nuk është regjistruar një procedim penal;
4. Dokument që vërteton që nuk ka çështje gjyqësore në ngarkim;
5. Vetëdeklarim të gjendjes gjyqësore;
6. Vërtetim nga Institucioni që nuk ka masë disiplinore në fuqi;
7. Vlerësimin e fundit nga Eprori Direkt;
8. Çdo dokumentacion tjetër që vërteton plotësimin e kushteve të mësipërme, si dhe trajnime, kualifikime, arsimin shtesë, vlerësimet positive apo të tjera të përmendura në jetëshkrim.
Kandidatët të cilët aplikojnë nëpërmjet postës elektronike, nëse do të vlerësohen që plotësojnë kriteret ligjore, duhet të paraqesin ditën e intervistës dokumentet origjinale ose të njësuara me origjinalin, që vërtetojnë kushtet e parashikuara sipas pikave 1-8.