Kolegji i Posaçëm i Apelimit zhvilloi sot, më datë 25.06.2024, ora 10:00, seancën gjyqësore publike të çështjes (JR) 23/2023, datë 26.05.2023, që i përket ankimit të Komisionerit Publik kundër vendimit të Komisionit të Pavarur të Kualifikimit, nr. 657, datë 28.04.2023, që lidhet me subjektin e rivlerësimit Periand Teta.
Gjatë paraqitjes së shkaqeve të ankimit, Komisionerja Publike Irena Nino vlerësoi se vendimi i Komisionit të Pavarur të Kualifikimit për të deklaruar të përfunduar procesin e rivlerësimit të subjektit të rivlerësimit Periand Teta, pa një vendim përfundimtar, nuk është i bazuar në legjislacionin që normon procesin e rivlerësimit. Komisionerja Publike i kërkoi Kolegjit ndryshimin e vendimit nr. 657, datë 28.04.2023 të Komisionit të Pavarur të Kualifikimit, ndërprerjen e procesit të rivlerësimit kalimtar dhe sipas nenit G të aneksit të Kushtetutës, ndalimin e subjektit të rivlerësimit për t’u emëruar gjyqtar ose prokuror i çdo niveli, anëtar i Këshillit të Lartë Gjyqësor ose i Këshillit të Lartë të Prokurorisë, Inspektoratit të Lartë të Drejtësisë ose Prokuror i Përgjithshme për një periudhë 15-vjeçare.
Subjekti i rivlerësimit prapësoi ankimin e Komisioneres Publike, duke deklaruar se ky ankim është i pambështetur në ligj e prova, as në jurisprudencën e deritanishme të Kolegjit të Posaçëm të Apelimit. Në mbështetje të pretendimeve të tij, subjekti i rivlerësimit depozitoi disa akte, të cilat kërkoi të pranohen si provë nga trupi gjykues. Subjekti i rivlerësimit i kërkoi Kolegjit që në mënyrë alternative, të vendosë lënien në fuqi të vendimit të KPK-së, ose prishjen e këtij vendimi dhe urdhërimin e Komisionit të Pavarur të Kualifikimit të vijojë procesin e rivlerësimit për subjektin e rivlerësimit, Periand Teta, bazuar në nenin 66, pika 1, shkronja “c”, e ligjit nr. 84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”.
Pasi u konsultua, trupi gjykues vendosi çeljen e hetimit gjyqësor të çështjes dhe pranimin në cilësinë e provës të akteve të depozituara nga subjekti i rivlerësimit. Pasi palët deklaruan se nuk kishin kërkesa të tjera procedurale, trupi gjykues vendosi mbylljen e hetimit gjyqësor të çështjes dhe i ftoi ato në paraqitjen e konkluzioneve përfundimtare.
Me kërkesë të Komisioneres Publike për kohë të arsyeshme për përgatitjen e konkluzioneve përfundimtare, trupi gjykues vendosi shtyrjen e seancës gjyqësore për në datën 28.06.2024, në orën 09:00.
Seanca në seancë publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.