Kolegji i Posaçëm i Apelimit zhvilloi më datë 21.01.2025, ora 10:00, seancën gjyqësore publike të çështjes (JR) 19/2024, datë 29.05.2024, që i përket ankimit të Komisionerit Publik kundër vendimit të Komisionit të Pavarur të Kualifikimit, nr. 730, datë 10.01.2024, që lidhet me subjektin e rivlerësimit Valentin Preçi.
Gjatë verifikimit të prezencës së palëve, kryesuesja e seancës bëri me dije se ishte paraqitur Drejtuesi i Prokurorisë së Posaçme, prezenca e të cilit në këtë proces gjyqësor legjitimohej bazuar në nenin 179/b, pika 8 e Kushtetutës së Republikës së Shqipërisë, dispozitë që ka përcaktuar kalimin e kompetencave nga Komisioneri Publik tek Drejtuesi i Prokurorisë së Posaçme.
Drejtuesi i Prokurorisë së Posaçme paraqiti shkaqet e ankimit për të trija kriteret e vlerësimit: z. Altin Dumani deklaroi se subjekti i rivlerësimit nuk ka arritur të provojë të kundërtën e barrës së provës për kriterin e pasurisë, ka kryer deklarim të pasaktë dhe të pamjaftueshëm, si dhe ka mungesë të burimeve të ligjshme për krijimin e pasurisë së tij; lidhur me kriterin e figurës deklaroi se subjekti i rivlerësimit nuk ka plotësuar saktë deklaratën e kontrollit të figurës dhe ka bërë deklarim të pamjaftueshëm lidhur me të, si edhe i kërkoi Kolegjit të marrë në konsideratë në vlerësimin tërësor të çështjes disa rrethana të përshkruara në shkaqet e ankimit që mund të çojnë në konflikt të mundshëm interesi të subjektit të rivlerësimit gjatë ushtrimit të detyrës së tij dhe cenim të besimit të publikut.
Drejtuesi i Prokurorisë së Posaçme, duke iu referuar denoncimeve të paraqitura në adresë të subjektit të rivlerësimit, i kërkoi Kolegjit të marrë në shqyrtim disa rrethana të caktuara që afektojnë sjelljen e magjistratit dhe kriterin e vlerësimit profesional. Drejtuesi i Prokurorisë së Posaçme kërkoi ndryshimin e vendimit të Komisionit të Pavarur të Kualifikimit, nr. 730, datë 10.01.2024 dhe shkarkimin nga detyra të subjektit të rivlerësimit Valentin Preçi.
Përfaqësuesja ligjore dhe subjekti i rivlerësimit paraqitën në mënyrë të detajuar prapësimet e tyre lidhur me shkaqet e ankimit për të trija kriteret e vlerësimit, duke i konsideruar ato të pabazuara në ligj e në prova, të padrejta dhe të drejtuara nga një llogjikë e gabuar. Në mbështetje të pretendimeve të tyre, subjekti i rivlerësimit dhe përfaqësuesja ligjore paraqitën edhe disa akte, të cilat kërkuan të merren si provë nga trupi gjykues.
Drejtuesi i Prokurorisë së Posaçme deklaroi se nga pikëpamja formale aktet përmbushin kriteret ligjore për t’u pranuar në cilësinë e provës.
Trupi gjykues, i konsultuar në vend, vendosi të çelë hetimin gjyqësor për të lejuar marrjen në cilësinë e provës të të gjitha akteve të depozituara nga subjekti i rivlerësimit.
Subjekti i rivlerësimit iu përgjigj disa pyetjeve të Drejtuesit të Prokurorisë së Posaçme dhe vëzhguesit të Operacionit Ndërkombëtar të Monitorimit në funksion të shqyrtimit të çështjes.
Në vijim, kryesuesja e seancës informoi se gjatë ditës së sotme në Kolegj, kishte mbërritur një denoncim i ri që i adresohet subjektit të rivlerësimit dhe që do t’u vihet në dispozicion palëve. Gjatë seancës së ardhshme që do të zhvillohet më datë 05.02.2025, ora 09:00, palët do të mbajnë qëndrim lidhur me këtë denoncim, si dhe do të duhet të jenë të përgatitura për konkluzionet përfundimtare të çështjes.
Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.