Kolegji i Posaçëm i Apelimit zhvilloi më datë 18.02.2025, ora 09:00, seancën gjyqësore publike të çështjes (JR) 19/2024, datë 29.05.2024, që i përket ankimit të Komisionerit Publik kundër vendimit të Komisionit të Pavarur të Kualifikimit, nr. 730, datë 10.01.2024, që lidhet me subjektin e rivlerësimit Valentin Preçi.
Gjatë paraqitjes së konkluzioneve përfundimtare, Drejtuesi i Prokurorisë së Posaçme deklaroi se gjatë procesit gjyqësor të zhvilluar në Kolegj, subjekti i rivlerësimit nuk arriti të provojë të kundërtën e shkaqeve të ankimit për të tria kriteret e vlerësimit. Z. Altin Dumani deklaroi se subjekti i rivlerësimit ka kryer deklarim të pasaktë dhe të pamjaftueshëm dhe nuk arriti të provojë burimin e ligjshëm të krijimit të pasurisë së tij. Lidhur me kriterin e vlerësimit të figurës, Drejtuesi i Prokurorisë së Posaçme deklaroi se subjekti i rivlerësimit ka kryer deklarim të pamjaftueshëm, ndërsa sa i përket kriterit të vlerësimit të aftësive profesionale, specifikisht konfliktit të interesit, deklaroi se ka rrethana që afektojnë sjelljen e subjektit të rivlerësimit gjatë ushtrimit të detyrës dhe që bien në kundërshtim me sjelljen dhe etikën e magjistratit.
Përfundimisht, Drejtuesi i Prokurorisë së Posaçme i kërkoi Kolegjit ndryshimin e vendimit të Komisionit të Pavarur të Kualifikimit, nr. 730, datë 10.01.2024 dhe shkarkimin nga detyra të subjektit të rivlerësimit Valentin Preçi.
Përfaqësuesja ligjore e subjektit të rivlerësimit kundërshtoi ankimin dhe i kërkoi përfundimisht Kolegjit mospranimin e tij, duke lënë në fuqi vendimin e Komisionit të Pavarur të Kualifikimit, nr. 730, datë 10.01.2024, që lidhet me subjektin e rivlerësimit Valentin Preçi, si një vendim tërësisht i bazuar në ligj e në prova dhe në parimin e objektivitetit, proporcionalitetit dhe paanshmërisë.
Pasi dëgjuan konkluzionet përfundimtare të palëve, trupi gjykues vendosi mbylljen e shqyrtimit gjyqësor të çështjes dhe u tërhoq në dhomë këshillimi për marrjen e vendimit përfundimtar, të cilin do ta shpallë më datë 26.02.2025, ora 15:00.
Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr. 3, Tiranë.