Kolegji i Posaçëm i Apelimit zhvilloi sot, më datë 30.09.2021, ora 10:00, seancën gjyqësore publike të çështjes (JR) nr.53/2020, datë 24.11.2020, që i përket ankimit të Komisionerit Publik kundër vendimit të Komisionit të Pavarur të Kualifikimit nr. 286, datë 04.08.2020, për subjektin e rivlerësimit Genti Shala.
.
Në këtë seancë Komisioneri Publik, z. Darjel Sina, paraqiti parashtrimet lidhur me ankimin e ushtruar nga Komisioneri Publik, z. Florian Ballhysa, i cili kishte njoftuar pamundësinë objektive të pjesëmarrjes së tij.
Komisioneri Publik, duke iu qëndruar shkaqeve të ankimit, kërkoi nga Kolegji i Posaçëm i Apelimit të riçelë hetimin gjyqësor për dy çështje të reja, të pahetuara dhe të patrajtuara nga Komisioni i Pavarur i Kualifikimit në vendimin objekt shqyrtimi. Konkretisht, të një denoncimi të dërguar në adresë të Operacionit Ndërkombëtar të Monitorimit, në datën 10.11.2020, në lidhje me pretendimin e pronësisë së fshehur të subjektit të rivlerësimit në një shoqëri ndërtuese dhe të një kontrate huaje të vitit 2015, pasqyruar në regjistrin noterial, administruar nga Ministria e Drejtësisë.
Në vijim të kërkimit të ankimit, Komisioneri Publik kërkoi nga trupi gjykues administrimin e plotë të praktikave dokumentare për dy çështjet e sipërcituara.
Subjekti i rivlerësimit nga ana e tij, prapësoi pretendimet e ngritura në denoncim, duke i cilësuar të rreme dhe dezinformuese, ndërsa për aktin noterial pretendoi për një gabim teknik në regjistrin noterial, duke theksuar se bëhej fjalë për një kontratë huapërdorje për përdorimin e një automjeti në vitin 2015, gjatë një udhëtimi familjar jashtë vendit, të cilin ia paraqiti trupit gjykues dhe kërkoi marrjen si provë në gjykim.
Trupi gjykues, me vendim të ndërmjetëm, vendosi të riçelë hetimin gjyqësor dhe të administrojë si prova aktet e depozituara nga subjekti i rivlerësimit si dhe të aksesojë dhe të administrojë drejtpërdrejtë të gjitha të dhënat dhe dokumentat e regjistruara në regjistrin tregtar të Qëndrës Kombëtare të Biznesit në dosjen elektronike të një shoqërie tregëtare, si dhe të mos hetojë lidhur me tre denoncime të depozituara në Kolegj.
Në vijim, pas përgjigjes së Komisionerit Publik, referuar pyetjeve të drejtuara nga një anëtar i trupit gjykues, u vendos mbyllja e hetimit gjyqësor dhe trupi gjykues ftoi palët të paraqesin konkluzionet përfundimtare në seancën e datës 07.10.2021, ora 14.00.
Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë