Kolegji i Posaçëm i Apelimit zhvilloi sot, më datë 10.05.2024, ora 09:00, seancën gjyqësore publike të çështjes (JR) 1/2024, datë 09.01.2024, që i përket ankimit të Komisionerit Publik dhe ankimit të ankuesit Besnik Maho kundër vendimit nr. 714, datë 15.11.2023, të Komisionit të Pavarur të Kualifikimit.
Gjatë verifikimit të prezencës së palëve, kryesuesja e seancës konstatoi sërish mungesën e ankuesit, z. Besnik Maho. Lidhur me këtë fakt, Komisioneri Publik përsëriti qëndrimin e tij për vijimin e gjykimit, në mungesë të ankuesit.
Gjatë paraqitjes së parashtrimeve, Komisioneri Publik deklaroi se ndryshe nga Komisioni i Pavarur i Kualifikimit, vlerëson se ankuesi z. Besnik Maho plotëson kushtet për të qenë subjekt rivlerësimi dhe për t’iu nënshtruar procesit të rivlerësimit kalimtar të gjyqtarëve dhe prokurorëve. Komisioneri Publik i kërkoi Kolegjit prishjen e vendimit nr. 714, datë 15.11.2023, të Komisionit të Pavarur të Kualifikimit dhe urdhërimin e Komisionit për nisjen e procedurave administrative të rivlerësimit për z. Besnik Maho.
Në mungesë të ankuesit Besnik Maho, kryesuesja e seancës citoi kërkimin e tij sipas parashtrimeve të dërguara elektronikisht në Kolegj, nëpërmjet e-mail-it të datës 06.05.2024: shfuqizimin e vendimit nr. 714, datë 15.11.2023, të Komisionit të Pavarur të Kualifikimit dhe dhënien e së drejtës kushtetuese dhe ligjore për t’iu nënshtruar procesit të rivlerësimit si gjyqtar që ka ushtruar këtë funksion për 3 vjet, bazuar në parashikimet e pikës 4 të nenit 179/b të Kushtetutës. Për efekt të procesverbalit, kryesuesja citoi aktet bashkëlidhur ankimit dhe parashtrimeve të ankuesit, të cilat, z. Maho, kërkonte të pranoheshin në cilësinë e provës nga Kolegji.
Pasi u konsultua, trupi gjykues vendosi mospranimin e akteve të paraqitura nga ankuesi, Besnik Maho, pasi një pjese e tyre ishin pjesë e fashikullit të Komisinit dhe pjesa tjetër nuk ishte paraqitur në formën e duhur ligjore.
Pas këtij vendimi të ndërmjetëm, Komisioneri Publik deklaroi se i qëndronte kërkimit përfundimtar të shprehur në përmbyllje të parashtrimeve të tij gjatë seancës së sotme.
Trupi gjykues vendosi mbylljen e shqyrtimit gjyqësor të çështjes dhe u tërhoq në dhome keshillimi për marrjen e vendimit përfundimtar, të cilin do ta shpallë më datë 13.05.2024, ora 15:00.
Seanca gjyqësore publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.