Kolegji i Posaçëm i Apelimit zhvilloi më datë 02.04.2025, ora 10:00, seancën gjyqësore publike të çështjes (JR) 36/2022, datë 29.07.2022, që i përket ankimit të Komisionerit Publik kundër vendimit të Komisionit të Pavarur të Kualifikimit, nr. 539, datë 08.06.2022, që lidhet me subjektin e rivlerësimit Hysni Mulaj.
Kryesuesja e seancës bëri me dije se neni 179/b, pika 8 e Kushtetutës së Republikës së Shqipërisë dhe neni 199 i Kodit të Procedurës Civile ka përcaktuar kalimin e kompetencave nga Komisioneri Publik tek drejtuesi i Prokurorisë së Posaçme, i përfaqësuar në këtë çështje me autorizim të veçantë nga prokurori i Prokurorisë së Posaçme z. Klodian Braho, i pranishëm në seancë.
Z. Braho paraqiti shkaqet e ankimit për kriterin e pasurisë, duke konsideruar se vendimi i Komisionit nuk është në harmoni me gjendjen e fakteve dhe provave të administruara në dosje, dhe se subjekti i rivlerësimit nuk ka arritur të provojë ligjshmërinë e burimit të krijimit të pasurisë së tij. Prokurori i Prokurorisë së Posaçme, z. Braho, kërkoi ndryshimin e vendimit të Komisionit të Pavarur të Kualifimit nr. 539, datë 08.06.2022 dhe shkarkimin nga detyra të subjektit të rivlerësimit Hysni Mulaj.
Përfaqësuesja ligjore e subjektitë të rivlerësimit deklaroi se shkaqet e ankimit nuk qëndrojnë, se janë të pabazuar në ligj e në prova, si dhe paraqiti në mënyrë të detajuar prapësimet lidhur me to, e disa akte që kërkoi të merren si provë nga trupi gjykues. Subjekti i rivlerësimit kërkoi lënien në fuqi të vendimit të Komisionit të Pavarur të Kualifikimit, nr. 539, datë 08.06.2022, që lidhet me subjektin e rivlerësimit Hysni Mulaj.
Në vijim, subjekti i rivlerësimit iu përgjigj disa pyetjeve të relatores së çështjes dhe vëzhgueses së Operacionit Ndërkombëtar të Monitorimit, në funksion të shqyrtimit të çështjes.
Pasi i ishte përcjellë nga Kolegji shpjegimi me shkrim i subjektit të rivlerësimit lidhur me një denoncim të publikut, prokurori i Prokurorisë së Posaçme, z. Braho, deklaroi se ky denoncim nuk përmbante rrethana apo fakte për hetime të mëtejshme. Ai u shpreh pro çeljes së hetimit gjyqësor të çështjes, me qëllim marrjen e provave të reja, të cilat do të vlerësohen në raport me shkaqet e ankimit.
Pasi u konsultua, trupi gjykues vendosi çeljen e hetimit gjyqësor, duke pranuar në cilësinë e provës aktet e depozituara nga subjekti i rivlerësimit, si dhe vendosi të mos hetojë lidhur me denoncimin e publikut. Seanca e ardhshme, në të cilën, palët duhet të jenë të përgatitura edhe për konkluzionet përfundimtare, do të zhvillohet më datë 07.04.2025, ora 14:00.
Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr. 3, Tiranë.