Kolegji i Posaçëm i Apelimit zhvilloi më datë 26.02.2020, ora 10:00, seancën gjyqësore publike për çështjen (JR) nr.13/2019, datë 27.02.2019 që i përket ankimit të paraqitur nga Komisioneri Publik kundër vendimit nr. 90, datë 20.12.2018 të Komisionit të Pavarur të Kualifikimit që lidhet me procesin e rivlerësimit kalimtar të subjektit të rivlerësimit Adnand Kosova.
Në fillim të seancës gjyqësore, subjekti i rivlerësimit paraqiti një dokument bankar të vitit 2020, mbi kryerjen nga ana e tij të një pagese për llogari të tatimeve, dokument që kërkoi të merret si provë nga trupi gjykues.
Pas kësaj kërkese paraprake, kryesuesi i seancës njohu palët me përgjigjet e ardhura nga Prokuroria e Përgjithshme dhe Prokuroria e Posaçme, sipas të cilave rezulton se nuk ka të regjistruar ndonjë procedim penal në ngarkim të dy shtetasve të referuar në denoncimin e paraqitur ne Kolegj për subjektin e rivlerësimit.
Trupi gjykues, i konsultuar në vend, vendosi të marrë si provë dokumentin bankar të depozituar nga subjekti i rivlerësimit, shkresën përcjellëse të Prokurorisë së Përgjithshme së bashku me praktikat e prokurorive përkatëse bashkëlidhur, si dhe shkresën e Strukturës së Posaçme Antikorrupsion.
Pasi mori deklarimin e palëve se nuk kishin kërkesa të tjera apo prova të reja për të paraqitur, trupi gjykues vendosi të mbyllë hetimin gjyqësor dhe ftoi palët të parashtrojnë konkluzionet e tyre përfundimtare në seancën e datës 03.03.2020, ora 11:30.
Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.