Calendar

Trupi gjykues i Kolegjit të Posaçëm të Apelimit, i përbërë nga Ina Rama kryesuese, Natasha Mulaj  relatore, Albana Shtylla, Rezarta Schuetz, Sokol Çomo anëtarë, shpalli vendimin për çështjen (JR) nr. 13/2020, datë 01.06.2020, që i përket ankimit të paraqitur nga Komisioneri Publik kundër vendimit të Komisionit të Pavarur të Kualifikimit nr. 221, datë 10.12.2019, që lidhet me subjektin e rivlerësimit Anita Jella.

Në përfundim të gjykimit, trupi gjykues, bazuar në nenin 66, pika 1, shkronja “a” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, me shumicë votash, vendosi:

1. Lënien në fuqi të vendimit të Komisionit të Pavarur të Kualifikimit nr. 221, datë 10.12.2019, që i përket subjektit të rivlerësimit Anita Jella.
2. Ky vendim është përfundimtar dhe ka efekt të menjëhershëm.

U shpall sot, në Tiranë, më datë 15.02.2022

Kolegji i Posaçëm i Apelimit zhvilloi sot, më datë 15.02.2022, ora 10:00, seancën plenare publike të çështjes (JD) 2/2021, datë 26.03.2021, me ankues Markelian Kuqo, kundër vendimit nr.633, datë 10.12.2020 të Këshillit të Lartë Gjyqësor “Për caktimin e masës disiplinore ndaj gjyqtarit Markelian Kuqo” dhe me subjekte të interesuar, Këshillin e Lartë Gjyqësor dhe Inspektorin e Lartë të Drejtësisë.

Pas verifikimit të prezencës së palëve, ankuesi paraqiti një kërkesë paraprake, nëpërmjet së cilës i kërkoi Kolegjit të konstatojë mungesën e kompetencës lëndore dhe funksionale për shqyrtimin e çështjes së tij dhe dërgimin e akteve Gjykatës Kushtetuese.

Të pyetur nga kryesuesja e seancës për qëndrimin e tyre lidhur me këtë kërkesë, përfaqësuesit e Këshillit të Lartë Gjyqësor dhe Inspektorit të Lartë të Drejtësisë deklaruan se kërkesa është e pabazuar në ligj dhe si e tillë, duhet rrëzuar.

Pasi u këshillua, bazuar në nenin 179/7 të Kushtetutës, nenin 5/3 të ligjit 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë, në nenin 71/3 të ligjit 8577/2000”Për organizimin dhe funksionimin e Gjykatës Kushtetuese të Republikës së Shqipërisë”, si dhe në referencë të vendimit nr.35, datë 26 shkurt 2021 të Kolegjit të Shqyrtimit Paraprak të Gjykatës Kushtetuese, trupi gjykues vendosi rrëzimin e kërkesës së ankuesit Markelian Kuqo.

Lidhur me kërkesën tjetër paraprake të ankuesit, nëpërmjet së cilës paraqiti pretendime mbi parashtrimet e KLGJ-së dhe ILD-së, si dhe aktet e procedimit disiplinor të administruara nga KLGJ, trupi gjykues vendosi që këto kërkesa në vetvete nuk konsiderohen si kërkesa paraprake, ndaj, për këtë arsye, ato mund të zgjidhen gjatë shqyrtimit gjyqësor të çështjes në Kolegj.

Pasi relatorja paraqiti në mënyrë të përmbledhur ankimin e z. Markelian Kuqo, kryesuesja e seancës ftoi ankuesin të paraqiste parashtrimin e tij në seancën gjyqësore. Ankuesi kërkoi kohë shtesë për të plotësuar ankimin e tij, duke e parë në një këndvështrim të ri pas marrjes së vendimit të ndërmjetëm të Kolegjit. Duke qenë se kjo kërkesë u rrëzua nga trupi gjykues me arsyetimin se vendimi i shpallur në seancën e sotme nuk afekton ankimin, z. Markelian Kuqo deklaroi vetëm se i qëndron ankimit të tij.

Subjektet e interesuara KLGj dhe ILD paraqitën parashtrimet e tyre, duke i kërkuar Kolegjit rrëzimin e ankimit të ankuesit z.Markelian Kuqo dhe lënien në fuqi të vendimit nr.633, datë 10.12.2020 të Këshillit të Lartë Gjyqësor “Për caktimin e masës disiplinore të shkarkimit nga detyra të gjyqtarit Markelian Kuqo”.

Ankuesi i drejtoi një sërë pyetjesh që lidhen me rrethanat që çuan në këtë vendimarrje, përfaqësuesit të Këshillit të Lartë Gjyqësor dhe përfaqësueseve të Inspektorit të Lartë të Drejtësisë.

Në përgjigje të kërkesës së subjekteve të interesuara për kohë të arsyeshme për përgatitjen e përgjigjeve, trupi gjykues vendosi të shtyjë seancën gjyqësore për në datën 11.03.2022, ora 10:00.

Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.

Kolegji i Posaçëm i Apelimit zhvilloi sot, më datë 17.02.2022, ora 10:00, seancën plenare publike të çështjes (JD) 3/2021, datë 30.04.2021, me ankues Bujar Memia, kundër vendimit nr.81, datë 31.03.2021 të Këshillit të Lartë të Prokurorisë “Për caktimin e masës disiplinore ndaj prokurorit Bujar Memia” dhe me subjekte të interesuar, Inspektoratin e Lartë të Drejtësisë (ILD) dhe Këshillin e Lartë të Prokurorisë (KLP).

Pas verifikimit të prezencës së palëve, ankuesi paraqiti dy kërkesa paraprake, nëpërmjet së cilave kërkoi: konstatimin e mungesës së kompetencës së Kolegjit për shqyrtimin e çështjes së tij, si dhe çmuarjen si të pavlefshëm të aktit të përfaqësimit të Inspektorit të Lartë të Drejtësisë.

Pasi u këshillua, bazuar në nenin 179/7 të Kushtetutës, nenin 5/3 të ligjit 84/2016 “Për rivlerësimin kalimtar të gjyqtarëve dhe prokurorëve në Republikën e Shqipërisë, në nenin 71/3 të ligjit 8577/2000”Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar, trupi gjykues vendosi rrëzimin e kërkesës së parë të ankuesit Bujar Memia.

Lidhur me kërkesën për çmuarjen si të pavlefshme të aktit të përfaqësimit të Inspektorit të Lartë të Drejtësisë, trupi gjykues vendosi të marrë kohë për vlerësimin e saj dhe për këtë arsye, u vendos shtyrja e seancës për ditën e nesërme, më datë 18 shkurt 2022, ora 11:30.

Seanca plenare publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.

Kolegji i Posaçëm i Apelimit zhvilloi më datë 18.02.2022, ora 09:30, seancën gjyqësore publike të çështjes (JR) 62/2019, datë 12.12.2019 që i përket ankimit të subjektit të rivlerësimit Dhurata Haveri kundër vendimit të Komisionit të Pavarur të Kualifikimit nr. 197, datë 27.09.2019.

Në këtë seancë gjyqësore u thërrit në cilësinë e dëshmitarit, shtetasi V.V, i cili iu përgjigj pyetjeve të përfaqësueses ligjore të subjektit të rivlerësimit, pyetjeve sqaruese dhe verifikuese të trupit gjykues si dhe pyetjeve të vëzhgueses ndërkombëtare të ONM-së.

Në mbështetje të përgjigjeve të tij, dëshmitari depozitoi disa akte shkresore.

Në kuadër të shpjegimeve të z. V.V në cilësinë e dëshmitarit, por njëkohësisht edhe në cilësinë e personit tjetër të lidhur me subjektin e rivlerësimit, trupi gjykues vendosi të shtyjë seancën gjyqësore për në datën 4 mars 2022, ora 10:00, në funksion të vendimmarrjes lidhur me pranimin ose jo si provë të akteve të paraqitura nga dëshmitari.

Seanca gjyqësore publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.

Kolegji i Posaçëm i Apelimit zhvilloi sot, më datë 18.02.2022, ora 11:30, seancën plenare publike të çështjes (JD) 3/2021, datë 30.04.2021, me ankues Bujar Memia, kundër vendimit nr.81, datë 31.03.2021 të Këshillit të Lartë të Prokurorisë “Për caktimin e masës disiplinore ndaj prokurorit Bujar Memia” dhe me subjekte të interesuar, Inspektoratin e Lartë të Drejtësisë (ILD) dhe Këshillin e Lartë të Prokurorisë (KLP).

Lidhur me kërkesën e ankuesit për çmuarjen si të pavlefshëm të aktit të përfaqësimit të Inspektorit të Lartë të Drejtësisë, trupi gjykues nuk arriti shumicën e kërkuar sipas nenit 72/2, i lidhur me nenin 73/4 të ligjit të ligjit 8577/2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar; për këtë arsye, vendosi rrëzimin e kërkesës së ankuesit bazuar në nenin 39/2 të ligjit 8577/2000.

Në vijim, ankuesi paraqiti një kërkesë të re paraprake, nëpërmjet së cilës kërkoi akte të tjera nga Këshilli i Lartë i Prokurorisë dhe Inspektori i Lartë i Drejtësisë. Lidhur me këtë kërkesë përfaqësuesi i KLP-së deklaroi se ky institucion nuk dispozon akte të tjera veç fashikullit që i ka përcjellë Kolegjit dhe që përfshin të gjitha aktet e dërguara nga ILD-ja dhe ato të prodhuara nga KLP-ja.

Përfaqësuesja e ILD-së sqaroi se ankuesi kërkon informacione nga raporti i procedimit disiplinor për çështje lidhur me të cilat nuk i është kërkuar të mbajë përgjegjësi disiplinore.

Pasi dëgjoi shpjegimet e përfaqësuesve të Këshillit të Lartë të Prokurorisë dhe Inspektorit të lartë të Drejtësisë, trupi gjykues vendosi rrëzimin e kërkesës së paraqitur nga ankuesi Bujar Memia për kërkimin e akteve nga këto institucione. Duke qenë se debati gjyqësor lidhur me kërkesën paraprake të ankuesit, si dhe shpjegimet që dhanë palët pjesëmarrëse në gjykim morën një kohë relativisht të gjatë, duke pasur në konsideratë, gjithashtu, faktin që debati gjyqësor lidhur me themelin e ankimit nuk mund të mbyllej brenda ditës së sotme, seanca u shty për në datën 15 mars 2022, ora 10:00.

Seanca plenare publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.