Kolegji i Posaçëm i Apelimit zhvilloi sot, më datë 27.05.2024, ora 10:00, seancën gjyqësore publike të çështjes (JR) 28/2021, datë 25.05.2021, që i përket ankimit të subjektit të rivlerësimit Rita Gjati kundër vendimit të Komisionit të Pavarur të Kualifikimit, nr. 358, datë 19.03.2021.
Subjekti i rivlerësimit, znj. Rita Gjati, dhe përfaqësuesja e saj ligjore u dëgjuan nga trupi gjykues teksa paraqitën në mënyrë të detajuar kundërshtimet e tyre lidhur me vendimin e Komisionit të Pavarur të Kualifikimit nr. 358, datë 19.03.2021, duke deklaruar se ky vendim është marrë në interpretim të gabuar të ligjit, provave dhe rrethanave të çështjes për të trija kriteret e rivlerësimit, si dhe në të, mbetet i paarsyetuar nocioni i cenimit të besimit të publikut tek drejtësia. Subjekti i rivlerësimit pretendoi se arrin nivel të besueshëm në të trija kriteret e rivlerësimit, atë të pasurisë, aftësive profesionale dhe kriterit të figurës, dhe në mbështetje të këtyre pretendimeve, depozitoi bashkëlidhur parashtrimeve të saj, akte të reja të cilat kërkoi të pranohen në cilësinë e provës nga trupi gjykues.
Subjekti i rivlerësimit iu përgjigj disa pyetjeve të relatorit të çështjes në funksion të shqyrtimit të çështjes,
Pasi u konsultua, trupi gjykues vendosi të çelë hetimin gjyqësor të çështjes dhe të pranojë në cilësinë e provës një pjesë të akteve të depozituara nga subjekti i rivlerësimit dhe të refuzojë pjesën tjetër të akteve, për arsye të mosplotësimit të kritereve formale, por që pavarësisht, informacioni të cilin përmbajnë, mund të aksesohet nga burime të hapura të informacionit.
Pasi subjekti i rivlerësimit deklaroi se nuk ka kërkesa të tjera procedurale, trupi gjykues vendosi të mbyllë hetimin gjyqësor të çështjes dhe e ftoi atë në paraqitjen e konkluzioneve përfundimtare.
Përfundimisht, subjekti i rivlerësimit, znj. Rita Gjati, i kërkoi Kolegjit ndryshimin e vendimit të Komisionit të Pavarur të Kualifikimit, nr. 358, datë 19.03.2021 dhe konfirmimin e saj në detyrë.
Trupi gjykues vendosi mbylljen e shqyrtimit gjyqësor të çështjes dhe u tërhoq në dhomë këshillimi për marrjen e vendimit përfundimtar, të cilin do ta shpallë më datë 05.06.2024, ora 15:00.
Seanca gjyqësore publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.