Calendar

Kolegji i Posaçëm i Apelimit zhvilloi sot, më datë 06.06.2022, ora 10:00, seancën gjyqësore publike të çështjes (JR) 14/2021, datë 30.03.2021, që i përket ankimit të Komisioneres Publike kundër vendimit nr. 325, datë 14.12.2020, të Komisionit të Pavarur të Kualifikimit që lidhet me subjektin e rivlerësimit Rilinda Selimi.

Trupi gjykues vendosi të pranojë në cilësinë e provës aktet e sjella nga subjekti i rivlerësimit më datë 22.04.2022, në Kolegj, sipas inventarit në parashtrimet e paraqitura prej saj.

Trupi gjykues vendosi të mos kërkojë informacion dhe prova shtesë, sipas kërkesës së Komisioneres Publike, pasi provat e pranuara vlerësohen të mjaftueshme për zgjidhjen e çështjes.

Pasi palët deklaruan se nuk kishin kërkesa të tjera procedurale, trupi gjykues vendosi të mbyllë hetimin gjyqësor të çështjes dhe ftoi palët të paraqesin konkluzionet përfundimtare.

Duke marrë parasysh kërkesën e Komisioneres Publike për kohë të mjaftueshme për përgatitjen e konkluzioneve përfundimtare, trupi gjykues vendosi të shtyjë seancën gjyqësore për në datën 20 qershor 2022, ora 14:00.

Seanca gjyqësore publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3, Tiranë.

Në Kolegjin e Posaçëm të Apelimit është regjistruar çështja (JR) nr. 23/2022, datë 30.05.2022, që i përket ankimit të Komisionerit Publik kundër vendimit nr. 524, datë 08.04.2022, të Komisionit të Pavarur të Kualifikimit që lidhet me subjektin e rivlerësimit Elfrida Bregova.

Sot, në datën 06.06.2022, në Kolegjin e Posaçëm të Apelimit u hodh shorti për caktimin e trupit gjykues, kryesuesin e këtij trupi dhe relatorin e çështjes.

Trupi gjykues i caktuar me short është i përbërë si më poshtë vijon:

Kryesuese:  Rezarta Schuetz

Relatore:     Albana Shtylla

Anëtarë:     Sokol Çomo, Ina Rama, Mimoza Tasi

*********************************

Sot, më datë 06.06.2022, në Kolegjin e Posaçëm të Apelimit u hodh shorti për zëvendësimin e gjyqtarit Ardian Hajdari, i caktuar kryesues në çështjen (JR) nr. 40/2020, datë 21.09.2020, që i përket ankimit të Komisionerit Publik kundër vendimit 256, datë 12.06.2020, të Komisionit të Pavarur të Kualifikimit që lidhet me subjektin e rivlerësimit Etleva Deda.

Zëvendësimi i gjyqtarit Ardian Hajdari është bërë për shkak të pezullimit të tij nga detyra me vendimin nr. 13, datë 07.02.2022 të Mbledhjes së Gjyqtarëve të Kolegjit të Posaçëm të Apelimit.

Pas hedhjes së shortit, për caktimin e gjyqtarit anëtar dhe më pas, për kryesuesin, trupi gjykues i çështjes (JR) nr. 40/2020, datë 21.09.2020, do të ketë përbërjen që vijon:

Kryesuese: Rezarta Schuetz

Relatore:  Albana Shtylla      

Anëtarë:  Sokol Çomo, Natasha Mulaj, Mimoza Tasi

************************

Sot, më datë 06.06.2022, në Kolegjin e Posaçëm të Apelimit u hodh shorti për zëvendësimin e gjyqtarit Ardian Hajdari dhe gjyqtarit Luan Daci, të caktuar si kryesues dhe anëtar në çështjen (JR) nr. 27/2020, datë 09.07.2020, që i përket ankimit të subjektit të rivlerësimit Gjovalin Përnoca kundër vendimit nr. 196, datë 13.09.2019 të Komisionit të Pavarur të Kualifikimit.

Zëvendësimi i gjyqtarit Luan Daci është bërë për shkak të shkarkimit të tij nga detyra me vendimin nr. 1 (JD), datë 09.12.2021 të Komisionit Disiplinor të Kolegjit të Posaçëm të Apelimit dhe zëvendësimi i gjyqtarit Ardian Hajdari është bërë për shkak të pezullimit të tij nga detyra me vendimin nr. 13, datë 07.02.2022 të Mbledhjes së Gjyqtarëve të Kolegjit të Posaçëm të Apelimit.

Përfundimisht, trupi gjykues i çështjes (JR) nr. 27/2020, datë 09.07.2020, do të ketë përbërjen që vijon:

Kryesuese: Albana Shtylla

Relatore:  Natasha Mulaj

Anëtarë:  Sokol Çomo, Rezarta Schuetz, Mimoza Tasi

Kolegji i Posaçëm i Apelimit zhvilloi sot, më datë 07.06.2022, ora 10:00, seancën gjyqësore publike të çështjes (JR) 35/2020, datë 11.09.2020, që i përket ankimit të Komisionerit Publik kundër vendimit nr. 255, datë 08.06.2020, të Komisionit të Pavarur të Kualifikimit që lidhet me subjektin e rivlerësimit Ludovik Dodaj.

Gjatë paraqitjes së shkaqeve të ankimit, Komisioneri Publik deklaroi se subjekti i rivlerësimit është në kushtet e deklarimit të pasaktë dhe të pamjaftueshëm për kontrollin e pasurisë dhe se nuk arrin nivel të besueshëm për konfirmimin e tij në detyrë.

Komisioneri Publik deklaroi se lidhur me kriterin e vlerësimit profesional, nga aktet e administruara në dosjen e Komisionit, kishte konstatuar disa elementë, të cilët, i kërkoi Kolegjit t’i konsiderojë në rivlerësimin e subjektit Ludovik Dodaj, bazuar në vlerësimin tërësor të procedurave, sipas nenit 4, pika 2 dhe nenit 61/5 të ligjit nr. 84/2016.

Komisioneri Publik i kërkoi Kolegjit të marrë në konsideratë shkaqet e ankimit dhe në përfundim të gjykimit të çështjes, të vendosë ndryshimin e vendimit të Komisionit të Pavarur të Kualifikimit, nr. 255, datë 8.6.2020 dhe shkarkimin nga detyra të subjektit të rivlerësimit.

Përfaqësuesja ligjore e subjektit të rivlerësimit kundërshtoi shkaqet e ankimit, duke pretenduar se janë të padrejta dhe deklaroi se subjekti i rivlerësimit ka shpjeguar bindshëm ligjshmërinë e të ardhurave të tij. Në mbështetje të parashtrimeve, subjekti i rivlerësimit paraqiti disa akte, të cilat kërkoi të merren si provë nga trupi gjykues, si dhe i kërkoi Kolegjit riçeljen e pjesshme të hetimit gjyqësor të çështjes.

Pasi u konsultua, trupi gjykues vendosi të çelë hetimin gjyqësor dhe të administrojë në cilësinë e provës aktet e listuara nga përfaqësuesja ligjore e subjektit të rivlerësimit, në seancën  e sotme gjyqësore. Me shumicë votash, trupi gjykues vendosi gjithashtu, t’i kërkojë Gjykatës së Rrethit Gjyqësor Durrës, një dosje gjyqësore, në funksion të shqyrtimit të çështjes.

I pyetur nga kryesuesja e seancës, Komisioneri Publik deklaroi se lidhur me provat e administruara nga Kolegji, rezervonte të drejtën të shprehej pasi të njihej me dosjen gjyqësore, që referohej në vendimin e ndërmjetëm të trupit gjykues.

Trupi gjykues, në pritje të administrimit të dosjes gjyqësore nga Gjykata e Rrethit Gjyqësor Durrës, vendosi të shtyjë seancën gjyqësore për në datën 27.6.2022, ora 10:00, dhe ftoi palët të përgatiten edhe për konkluzionet përfundimtare të çështjes.

Seanca gjyqësore publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3, Tiranë.

Ditën e martë, më datë 05.07.2022, ora 10:00, do të gjykohet në seancë gjyqësore publike çështja (JR) nr.40/2020, datë 21.09.2020 që i përket ankimit të Komisionerit Publik kundër vendimit të Komisionit të Pavarur të Kualifikimit nr. 256, datë 12.06.2020, që lidhet me subjektin e rivlerësimit Etleva Deda.

Trupi gjykues për gjykimin e kësaj çështjeje përbëhet nga:

Kryesuese: Rezarta Schuetz

Relatore: Albana Shtylla

Anëtarë: Mimoza Tasi, Natasha Mulaj, Sokol Çomo

Seanca gjyqësore publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3, Tiranë.

Kolegji i Posaçëm i Apelimit zhvilloi më datë 08.06.2022, ora 10:00, seancën gjyqësore publike të çështjes (JR) 31/2020, datë 30.07.2020, që i përket ankimit të subjektit të rivlerësimit Adnand Xhelili kundër vendimit të Komisionit të Pavarur të Kualifikimit, nr. 237, datë 12.02.2020.

Gjatë verifikimit të prezencës së palëve, kryesuesja e trupit gjykues konstatoi mungesën e subjektit të rivlerësimit z. Adnand Xhelili, i cili kishte njoftuar paraprakisht Kolegjin që, për arsye shëndetësore, e kishte të pamundur pjesëmarrjen në seancë dhe kërkonte shtyrjen e saj, duke paraqitur dhe dokumentacionin mjekësor përkatës.

Trupi gjykues, pasi shqyrtoi kërkesën e paraqitur nga subjekti i rivlerësimit dhe dokumentacionin bashkëlidhur, vendosi shtyrjen e seancës gjyqësore publike për në datën 26 korrik 2022, ora 10:00, duke e ftuar subjektin e rivlerësimit që në rast pamundësie për t’u paraqitur personalisht, të marrë pjesë në seancë nëpërmjet përfaqësuesit të tij ligjor. Në rast mosparaqitje të subjektit apo përfaqësuesit të tij ligjor, trupi gjykues do të revokojë vendimin e ndërmjetëm për mbajtjen e seancës gjyqësore publike, duke vijuar shqyrtimin e çështjes në dhomë këshillimi.

Gjithashtu, trupi gjykues bëri me dije se nëse kërkohet nga ana e subjektit të rivlerësimit, Kolegji mund ta zhvillojë seancën gjyqësore publike në një ambient të përshtatshëm me gjendjen e tij shëndetësore.

Trupi gjykues i Kolegjit të Posaçëm të Apelimit, i përbërë nga Natasha Mulaj kryesuese, Albana Shtylla relator, Mimoza Tasi, Rezarta Schuetz, Sokol Çomo anëtarë, shpalli vendimin për çështjen (JR) nr. 22/2020, datë 26.06.2020, që i përket ankimit të Komisionerit Publik kundër vendimit të Komisionit të Pavarur të Kualifikimit nr. 229, datë 28.01.2020, që lidhet me subjektin e rivlerësimit Dritan Banushi.

Në përfundim të gjykimit, trupi gjykues, bazuar në nenin 66, pika 1, shkronja “b” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, në mënyrë unanime, vendosi:

1. Ndryshimin  të vendimit nr. 229, datë 28.01.2020 të Komisionit të Pavarur të Kualifikimit, duke vendosur  shkarkimin nga detyra të subjektit të rivlerësimit Dritan Banushi.
2. Ky vendim është përfundimtar dhe ka efekt të menjëhershëm.

U shpall sot, në Tiranë, më datë 08.06.2022.

Ditën e mërkurë, më datë 06.07.2022, ora 10:00, do të gjykohet në dhomë këshillimi çështja (JR) nr. 37/2020, datë 16.09.2020 që i përket ankimit të subjektit të rivlerësimit Spartak Çoçoli kundër vendimit të Komisionit të Pavarur të Kualifikimit nr. 274, datë 16.07.2020.

Trupi gjykues për gjykimin e kësaj çështjeje përbëhet nga:

Kryesuese: Rezarta Schuetz

Relatore: Albana Shtylla

Anëtarë: Ina Rama, Natasha Mulaj, Mimoza Tasi

Seanca në dhomë këshillimi do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.

Duke qenë se dita e mërkurë, 25.05.2022, u caktua ditë pushimi me vendimin e Këshillit të Ministrave nr. 317, datë 18.05.2022, seanca gjyqësore publike për çështjen (JR) 19/2021, datë 19.04.2021, që lidhet me subjektin e rivlerësimit Elbana Lluri, e planifikuar për t’u zhvilluar në këtë ditë, u shty për t’u zhvilluar sot, më datë 09.06. 2022, ora 09:30.

Gjithashtu, edhe seanca gjyqësore publike për çështjen (JR) 40/2021, datë 23.07.2021, që lidhet me subjektin e rivlerësimit Gerd Hoxha, e planifikuar për t’u zhvilluar po më date 25.05.2022,  do të zhvillohet sot, me datë 09.06. 2022, ora 13:00.

****************************

Në Kolegjin e Posaçëm të Apelimit është regjistruar çështja (JR) nr. 24/2022, datë 03.06.2022, që i përket ankimit të Komisionerit Publik kundër vendimit nr. 519, datë 25.03.2022, të Komisionit të Pavarur të Kualifikimit që lidhet me subjektin e rivlerësimit Kastriot Gramshi.

Sot, në datën 09.06.2022, në Kolegjin e Posaçëm të Apelimit u hodh shorti për caktimin e trupit gjykues, kryesuesin e këtij trupi dhe relatorin e çështjes.

Trupi gjykues i caktuar me short është i përbërë si më poshtë vijon:

Kryesuese:  Albana Shtylla

Relatore:     Rezarta Schuetz

Anëtarë:     Sokol Çomo, Natasha Mulaj, Ina Rama

Kolegji i Posaçëm i Apelimit zhvilloi sot, më datë 09.06.2021, ora 09:30, seancën gjyqësore publike të çështjes (JR) 19/2021, datë 19.04.2021, që i përket ankimit të Komisionerit Publik kundër vendimit nr. 342, datë 02.02.2021, të Komisionit të Pavarur të Kualifikimit që lidhet me subjektin e rivlerësimit Elbana Lluri.

Në vijim të seancës së mëparshme, palët konfirmuan njohjen me aktet që janë pjesë e fashikullit të çështjes së ish – bashkëshortit të subjektit të rivlerësimit dhe shprehën qëndrimet e tyre lidhur me analizën financiare të përgatitur nga Kolegji, të mbështetur në shkaqet e ankimit të Komisionerit Publik.

Komisioneri Publik deklaroi se analiza financiare pasqyron të gjitha kërkesat e ngritura në shkaqet e ankimit të Komisionerit Publik.

Subjekti i rivlerësimit, znj. Elbana Lluri, paraqiti prapësimet e saj lidhur me analizën financiare, duke pretenduar se është një analizë e pasaktë, e padrejtë dhe në të, nuk përfshihen të gjitha të dhënat mbi të ardhurat e personave të lidhur me subjektin e rivlerësimit. Subjekti i rivlerësimit paraqiti disa akte të reja bashkëlidhur prapësimeve, të cilat kërkoi të pranohen si provë nga trupi gjykues. Subjekti i rivlerësimit, znj. Elbana Lluri, i kërkoi Kolegjit të marrë në konsideratë prapësimet e saj për analizën financiare të përgatitur në funksion të ankimit të Komisionerit Publik, si dhe lënien në fuqi të vendimit nr. 342, datë 02.02.2021 të Komisionit të Pavaur të Kualifikimit.

Subjekti i rivlerësimit iu përgjigj disa pyetjeve të relatores, në funksion të shqyrtimit të çështjes.

Pasi u konsultua, trupi gjykues vendosi të pranojë në cilësinë e provës një akt të depozituar nga subjekti i rivlerësimit, të lëshuar nga Instituti i Sigurimeve Shoqërore. Sa i përket denoncimeve të publikut, trupi gjykues vlerësoi që nuk plotësojnë kushtet e nenit 53, të ligjit 84/2016.

Pasi palët deklaruan se nuk kishin kërkesa të tjera procedurale, trupi gjykues vendosi të mbyllë shqyrtimin gjyqësor të çështjes dhe ftoi palët të paraqesin konkluzionet përfundimtare në seancës e radhës, më datë 22.06.2022, ora 10:00.

Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.

Kolegji i Posaçëm i Apelimit zhvilloi sot, më datë 09.06.2021, ora 13:00, seancën gjyqësore publike të çështjes (JR) 40/2021, datë 23.07.2021, që i përket ankimit të Komisioneres Publike kundër vendimit nr. 393, datë 03.06.2021, të Komisionit të Pavarur të Kualifikimit që lidhet me subjektin e rivlerësimit Gerd Hoxha.

Në vijim të seancës së mëparshme, palët konfirmuan njohjen me me provat e reja – aktet që janë pjesë e fashikullit të çështjes së ish – bashkëshortes së subjektit të rivlerësimit – dhe shprehën qëndrimet e tyre lidhur me analizën financiare paraprake të përgatitur nga Kolegji, të mbështetur në shkaqet e ankimit të Komisioneres Publike.

Komisionerja Publike, znj. Irena Nino, kundërshtoi pretendimet e subjektit të rivlerësimit për kërkime nga ana e saj në tejkalim të shkaqeve të ankimit që lidhen me kriterin e pasurisë, si dhe deklaroi se rezervon të drejtën të shprehet lidhur me analizën financiare, gjatë paraqitjes së konkluzioneve përfundimtare.

Subjekti i rivlerësimit paraqiti prapësimet e tij lidhur me analizën financiare paraprake, duke pretenduar se është një analizë e pabazuar në ligj, nuk përputhet me jurisprudencën e deritanishme të Kolegjit, si dhe cënon parimin e sigurisë juridike. Nëpërmjet një kërkese procedurale, subjekti i rivlerësimit i kërkoi Kolegjit, shpalljen si të pavlefshme të analizës financiare ose rikryerjen e saj, duke përfshirë qëndrimet që ka mbajtur subjekti i rivlerësimit lidhur me çështjen, gjatë seancave të mëparshme të zhvilluara në Kolegj. Me shumicë votash, trupi gjykues vendosi të mos pranojë këto kërkesa të subjektit të rivlerësimit.

Në vijim të seancës, subjekti i rivlerësimit përsëriti qëndrimin e tij të mbajtur në seancën e datës 05.04.2022, duke deklaruar se shkaqet e ankimit të Komisioneres Publike janë të pasakta, të pabazuara në ligj dhe në prova dhe i  kërkoi Kolegjit të mos pranojë ankimin.

Pasi palët deklaruan se nuk kishin kërkesa të tjera procedurale, trupi gjykues vendosi të mbyllë shqyrtimin gjyqësor të çështjes dhe ftoi palët në paraqitjen e konkluzioneve përfundimtare të çështjes, në seancën e radhës, më datë 22 qershor 2022, ora 14:30.

Seanca publike do të zhvillohet në ambientet e Kolegjit të Posaçëm të Apelimit, në adresën: Bulevardi “Dëshmorët e Kombit”, nr.3. Tiranë.

Trupi gjykues i Kolegjit të Posaçëm të Apelimit, i përbërë nga Mimoza Tasi kryesuese, Sokol Çomo relator, Albana Shtylla, Natasha Mulaj, Rezarta Schuetz anëtarë, shpalli vendimin për çështjen (JR) nr. 14/2020, datë 01.06.2020, që i përket ankimit të subjektit të rivlerësmit Anila Guri kundër vendimit të Komisionit të Pavarur të Kualifikimit nr. 184, datë 19.07.2019.

Në përfundim të gjykimit, trupi gjykues, bazuar në nenin 66, pika 1, shkronja “b” e ligjit nr.84/2016, “Për rivlerësimin kalimtar të gjyqtarëve dhe prokurorëve në Republikën e Shqipërisë”, me shumicë votash, vendosi:

1. Ndryshimin e vendimit nr. 184, datë 19.07.2019 të Komisionit të Pavarur të Kualifikimit, që i përket subjektit të rivlerësimit Anila Guri dhe konfirmimin e saj në detyrën e gjyqtares në Gjykatën e Rrethit Gjyqësor Tiranë.
2. Ky vendim është përfundimtar dhe ka efekt të menjëhershëm.

U shpall sot, në Tiranë, më datë 10.06.2022.